پس از حملات تروریستی به کنسولگریهای هند و پاکستان و افزایش ناامنی و بیثباتی در شمال افغانستان، تاجیکستان دو کنسولگری خود در ولایتهای بدخشان و قندوز را به صورت موقت بست.
به گزارش شفقنا افغانستان، سفارت تاجیکستان با ارسال نامهای رسمی به وزارت امور خارجه افغانستان اعلام کرد که به دلیل ناامنیها در شمال افغانستان، این کشور کنسولگریهای خود در ولایتهای «بدخشان» و «قندوز» را به صورت موقت تعطیل میکند.
همچنین قرار بود تاجیکستان فعالیتهای کنسولگری خود در شهر مزارشریف را هم به حالت تعلیق در آورد اما مقامات محلی ولایت بلخ به آنان اطمینان دادند که امنیت این نهاد سیاسی را تامین میکنند.
گفته میشود که مقامات تاجیکستان پس از حمله به کنسولگریهای هند و پاکستان در شهرهای مزارشریف و جلالآباد افغانستان، تصمیم به بستن دو کنسولگری خود در ولایتهای بدخشان و قندوز را گرفته است.
وزارت امور خارجه افغانستان ضمن تایید این خبر گفت: تاجیکستان به علت ناامنی دو کنسولگری خود را بسته است اما این اقدام تاثیری بر روابط کابل و دوشنبه نخواهد گذاشت.
خیرالله آزاد، معاون سخنگوی وزارت امورخارجه این اقدام تاجیکستان را موقتی بیان کرد.
والی بدخشان نیز گفت: مقامات تاجیکستانی ناامنی را دلیل اصلی بسته شدن کنسولگری کشورشان در این ولایت میدانند.
به نقل از منابع، چندی پیش دو حمله تروریستی به کنسولگریهای هند در مزارشریف و پاکستان در جلالآباد صورت گرفت که تلفاتی بر جای گذاشت.
انتهای پیام