شفقناافغانستان- صبح امروز منطقه «درقد» ولایت «تخار» که تحت کنترل طالبان است مورد حمله هوایی جنگنده های ناشناس قرار گرفت و مقامات محلی تخار این بمباران را از ناحیه روسیه و تاجیکستان اعلام کردند.
این درحالی است که وزارت دفاع روسیه و کمیته دولتی امنیت ملی تاجیکستان نیز این ادعا را رد کردند.
وزارت دفاع روسیه با انتشار بیانیه ای اعلام کرد جنگندههای این کشور طالبان را در شمال افغانستان هدف بمباران قرار نداده است.
این نهاد دفاعی روسیه تاکید کرده جنگنده های روسیه برای بمباران کردن نواحی همجوار تاجیکستان و افغانستان هیچ دستوری دریافت نکردند و به این مناطق برای انجام عملیاتی اعزام نشده اند.
کمیته دولتی امنیت ملی تاجیکستان نیز این حمله را رد کرد.
طالبان نیز در بیانیه ای دست داشتن شبه نظامیان این سازمان افراطی در حمله مسلحانه به شهروندان تاجیک در ناحیه «فرخار» استان ختلان تاجیکستان را تکذیب کرده است.
طالبان مدعی شده شبه نظامیان این گروه حق انجام عملیات در خارج از قلمرو افغانستان را ندارند و شهروندان تاجیکستان در ناحیه فرخار مورد حمله مسلحانه قاچاقچیان قرار گرفتند که به این سازمان هیچ ربطی ندارد.
بعد از ظهر روز 26 آگوست یک خودرو حامل سه شهروند تاجیکستان در ناحیه «فرخار» همجوار با افغانستان مورد حمله مسلحانه قرار گرفت که در نتیجه آن دو نفر کشته و یک تن دیگر زخمی شد.
بر اساس اخبار و گزارشهای منتشر شده اولیه، این حمله از سوی شبه نظامیان طالبان صورت گرفت که گویا به خودرو حامل شهروندان تاجیکستان از منطقه «درقد» ولایت «تخار» شلیک کردند.
در حالی این موضوع مطرح میشود که صبح امروز برخی از رسانهها و دیگر کشورها از حملات هوایی به منطقه «درقد» ولایت «تخار» خبر دادند.
از جمله «جواد هجری» سخنگوی والی تخار اعلام کرد روز یکشنبه بین قاچاقچیان و نیروهای مرزی تاجیکستان درگیری رخ داد که در نتیجه 2 مرزبان تاجیک کشته شدند.
وی ادامه داد: در پی این درگیری که به مدت 4 ساعت ادامه یافت نیروهای مرزی تاجیکستان بخشهایی از ولسوالی «درقد» را آماج موشک قرار دادند.
هجری افزود: بامداد امروز جنگندههای روسی یا تاجیک یک منطقه تحت کنترل طالبان در درقد را بمباران کردند.
انتهای پیام
