زمان انتشار : ۱۰ میزان ,۱۳۹۸ | ساعت : ۱۶:۴۶ | کد خبر : 348115 | چاپ

تاجیکستان ۴۸ زندانی افغان را به حکومت افغانستان سپرده است + تصاویر

شفقناافغانستان- مقام های دولتی تاجیکستان، ۴۸ زندانی افغان که سال‌ها به جرم قاچاق مواد مخدر در زندان‌های تاجیکستان نگهداری می‌شدند را برای اجرای حکمشان به افغانستان منتقل کردند.

به گزارش خبرگزاری شفقنا افغانستان، رسانه های تاجیکستان نوشت، این انتقال روز دوشنبه ۳۰ سپتامبر (۸ میزان) در منطقه ای در مرز تاجیکستان و افغانستان صورت گرفته است.
مقامات افغان در این رابطه می‌گویند که در ازای این واگذاری، چند شهروند تاجیک که به اتهام افراط گرایی و تروریسم در زندان های افغانستان بودند را به دوشنبه پایتخت تاجیکستان انتقال داده است.  
این دومین بار در سال جاری است که زندانیان افغان از تاجیکستان به افغانستان منتقل شده اند. پیش تر در ماه ژوئیه نیز ۸۰ زندانی افغان در همین منطقه مرزی به دولت افغانستان تحویل داده شدند.
 «سعید مسعود بدخش» سفیر افغانستان در دوشنبه در مصاحبه با یک رسانه تاجیکستان اعلام کرد: این زندانیان به زندان های افغانستان برده می‌شوند و ادامه دوره محکومیت خود را خواهند گذارند.
 وی افزود: اخیرا یک هیأت برای انتقال زندانیان افغان از تاجیکستان، به این کشور آمده بودند و در حال حاضر حدود ۷۰ زندانی افغان در زندان های تاجیکستان باقی مانده اند.
در گذشته نیز برخی زندانیان افغان از شرایط نا مناسب نگهداری در زندان های تاجیکستان شکایت کرده بودند؛ سال ۲۰۱۶ مقامات افغان از کشته شدن دو زندانی افغان در مدت چند ماه در زندان های تاجیکستان خبر دادند.
 یکی از مقامات وزارت دادگستری تاجیکستان اعلام کرد که بیشتر زندانیان خارجی که در زندان های تاجیکستان هستند را زندانیان افغان تشکیل می دهند.
بیشتر آنها به جرم قاچاق مواد مخدر زندانی هستند و دو نفر دیگر نیز به جرم قتل در زندان به سر می برند.
انتقال زندانیان تاجیک و افغان به وطنشان بر اساس یک توافقنامه میان دولت تاجیکستان و افغانستان از سال ۲۰۱۰ صورت می‌گیرد.  
 تاجیکستان و افغانستان بیش از یکهزار و ۳۰۰ کیلومتر مرز مشترک دارد و این یکی از راه های اساسی قاچاق مواد مخدر به روسیه و کشورهای دیگر محسوب می شود.
هر ساله تعداد زیادی از قاچاقچیان مواد مخدر افغان بازداشت یا در درگیری با نیروهای انتظامی کشته می شود.
در عین حال بسیاری از زندانیان تاجیک در افغانستان نیز متهم به همدستی با گروه های تروریستی و افراط گرایی هستند.
چهل و هشت زندانی افغانستانی امروز از طرف حکومت تاجکستان در شیرخان بندر به حکومت افغانستان جهت سپری نمودن بقیه دوره حبس شان تسلیم داده شد.

انتهای پیام

af.shafaqna.com

شفقنا در شبکه های اجتماعی: توییتر | فیسبوک | تلگرام