شفقناافغانستان-رئیس‌جمهور تاجیکستان از اشرف غنی برای شرکت در بیستمین سالگرد تأسیس سازمان همکاری‌های شانگ‌های دعوت به عمل آورد.
به گزارش خبرگزاری شفقناافغانستان، طبق اعلامیه ارگ، محمد اشرف غنی رئیس جمهوری اسلامی افغانستان قبل از ظهر امروز (پنجشنبه، 23 دلو) با امام علی رحمان رئیس جمهور تاجیکستان، صحبت تیلفونی کرد.
در این گفتگو، سران دو کشور در مورد گسترش روابط دوجانبه، پروسۀ صلح افغانستان و همکاری های منطقوی بحث و تبادل نظر نمودند.
رئیس جمهور تاجیکستان حمایت خویش را از دیدگاه ها و برنامه های حکومت افغانستان در عرصه اتصال منطقوی و پروسۀ صلح به رهبری و مالکیت افغان ها ابراز کرد.
همچنان رؤسای جمهور دو کشور بر گسترش همکاری های اقتصادی، تجارتی و سرحدی تاکید ورزیدند و رئیس جمهور تاجیکستان از رئیس جمهور غنی بخاطر اشتراک در ۲۰ مین سالگرد تاسیس سازمان همکاری های شانگ‌های که قرار است در ماه مارچ در تاجیکستان برگزار گردد، دعوت بعمل آورد.
