گزارش ها حاکی است که رییس جمهور کرزی روز دوشنبه هفته جاری در راس یک هیات بلند رتبه برای گسترش روابط دو جانبه عازم تاجیکستان خواهد شد.
به گزارش خبرگزاری شیعیان افغانستان (شفقنا افغانستان)؛ گفته شده که رییس جمهور حامد کرزی و امام علی رحمان، رییس جمهور تاجیکستان بعد از دیدار و گفتگو، چندین سند در زمینه همکاری های دوجانبه امضا خواهند کرد.
وزارت امور خارجه تاجیکستان با نشر اعلامیه ای گفته است که حامد کرزی رییس جمهور افغانستان و رییس جمهور تاجیکستان، روز (دوشنبه 29 میزان) در دوشنبه، پایتخت تاجیکستان دیدار و گفت و گو خواهند کرد.
در اعلامیه آمده است که این دیدار همچنان در مورد تقویت همکاری های دو جانبه و امنیت منطقه بحث و تبادل نظر خواهد شد.
رییس جمهور کرزی پیش از این نیز برای همکاری های دو جانبه و بحث و گفتگو روی مسایل مختلف به تاجیکستان رفته بود.
تاجکستان همسایه شمالی افغانستان به شمار می رود که گفته می شود بیش از ١٥٠٠ کیلومتر مرز مشترک با افغانستان دارد.
این کشور در جریان چند سال گذشته، در بخش های مختلف افغانستان را حمایت کرده است.
انتهای پیام