شفقنا افغانستان- وزارت تحصیلات عالی حکومت طالبان می‌گوید نام دانشگاه امریکایی در کابل را به دانشگاه بین‌المللی «افغان» تغییر می‌کند.
به گزارش خبرگزاری شفقنا افغانستان، ندا محمد ندیم، وزیر تحصیلات عالی حکومت طالبان می‌گوید: «برای ترقی افغانستان یک نوید تازه این است، پوهنتونی که در گذشته به نام پوهنتون افغان امریکایی فعالیت داشت، پس از این نام آن پوهنتون بین‌المللی افغان، گذاشته شده و در آن استادان پوهنتون به سویه دکترا تربیه خواهند شد.»
به گفته رسانه‌های نزدیک به طالبان، وزیر تحصیلات عالی طالبان که غرض مشوره با علما، محصلین و استادان دانشگاه‌ها به شمال کشور سفر کرده، در یک گردهمایی با محصلین دانشگاه‌ها در ولایت بلخ از آنها خواست تا علیه هر سخن باطل در فیسبوک و وتساپ مقابله کنند.
به گفته منبع، وزیر تحصیلات عالی طالبان به هدف ارتقای ظرفیت استادان دانشگاه، می‌خواهد که دانشگاه بین‌المللی افغان را تاسیس کنند.
وزیر تحصیلات عالی طالبان افزوه است که «در شرایط کنونی افغانستان با کمبود استادان دانشگاه مواجه است ولی نمی‌تواند استادان بیشتر را غرض فراگیری تحصیلات عالی به کشورهای بیرون اعزام کند.»
