شفقنا افغانستان-معاون سخنگوی وزارت خارجه طالبان میگوید که هیاتی از این وزارت به روز پنجشنبهی هفته گذشته از قونسلگری افغانستان در ولایت بدخشان تاجیکستان دیدار کرده است.
به گزارش خبرگزاری شفقنا افغانستان به نقل از طلوع نیوز، ضیا احمد تکل میافزاید که این سفر به هدف بررسی فعالیتهای این قونسلگری و از میان برداشتن چالشها به شهر خاروغ انجام شده است.
این هیات به ریاست رییس مالی و اداری وزارت خارجه طالبان به ولایت بدخشان تاجیکستان رفته است.
ضیا احمد تکل، معاون سخنگوی وزارت خارجه طالبان میگوید: «هیاتی از امورات قونسلگری ارزیابی کرد و همچنان گزارش بازسازی ساختمان قونسلگری را به رهبری وزارت خارجه ارائه کرد. ساختمان قونسلگری افغانستان به علت بارندگیها و برفباریهای اخیر، زیانمند شده بود.»
سفارت افغانستان در تاجیکستان میگوید که در حال حاضر دیپلوماتهای پیشین سرگرم کار در این قونسلگری استند و از سفر هیات طالبان به ولایت بدخشان تاجیکستان نیز اطلاعی ندارند.
بربنیاد اطلاعات وزارت خارجه طالبان، حکومت سرپرست این گروه تا کنون در چهارده کشور دیپلومات فرستاده است.
