دولت تاجیکستان قنسولگری این کشور در ولایت بدخشان در شمال کشور را پس از حدود شش ماه بستن، دوباره باز کرده است.
به گزارش شفقناافغانستان به نقل از بخدی؛ امید نظروف، سرقنسل تاجیکستان در بدخشان گفته است که با بازگشایی این قنسولگری برای شهروندان افغانستان و به خصوص باشندگان ولایت بدخشان در زمینه صدور ویزه سهولتهای بیشتر فراهم می شود.
آقای نظروف گفته است که برای گسترش همکاری دوجانبه و ایجاد سهولت برای صدور ویزه بیشتر تلاش خواهد کرد.
حدود شش ماه قبل پس از افزایش ناامنی در بدخشان، قنسولگری تاجیکستان در شهر فیض آباد مرکز این ولایت مسدود شد.
اما اکنون غلام سخی غفوری، قوماندان امنیه بدخشان از تأمین امنیت دیپلوماتهای تاجیکستان اطمینان داده است.
همچنان سخنگوی والی بدخشان گفته است پس از اینکه دولت تاجیکستان از تامین امنیت دیپلومات های این کشور اطمینان حاصل کرد، قنسولگری اش را بازگشایی کرد.
بدخشان در شمال کشور نزدیک به ۷۵۰ کیلومتر مرز مشترک با تاجیکستان دارد.
گفته می شود که ۹ ولسوالی مرزی ولایت بدخشان در کنار دریای آمو با تاجیکستان مرز مشترک دارد.
انتهای پیام
www.af.shafaqna.com
