شفقنا افغانستان- اشرف غنی با همتای تاجیکستانیاش؛ امام علی رحمان از طریق تلیفون گفتگو کرد. در این گفتگو رییس جمهور تاجیکستان از اشرف غنی دعوت کرده تا به دوشنبه سفر کند.
به گزارش خبرگزاری شفقنا افغانستان، ریاست جمهوری میگوید که دو طرف پیرامون روابط دوجانبه به ویژه تجارت، ترانزیت، تقویت هر چه بیشتر همکاریهای منطقه و افزایش همکاریها نیز گفتگو کردهاند.
اشرف غنی گفتهاست که سرحد افغانستان و تاجیکستان به نقطۀ دوستی و پیشرفت مبدل خواهد شد.
براساس اعلامیهای ارگ ریاستجمهوری که امروز (دوشنبه، ۳ سنبله) امام علی رحمان؛ رییس جمهور تاجیکستان در گفتگو با غنی گفتهاست که کشورش از روند صلح به رهبری و مالکیت حکومت افغانستان حمایت میکند.
امام علی رحمان وعده داده که تاجیکستان در نشستهای منطقه و بین المللی، در کنار افغانستان خواهد بود و از موقف حکومت افغانستان حمایت می نماید.
رییسجمهور تاجیکستان از رییسجمهورغنی به خاطر گسترش روابط دوجانبه و چندین جانبه و توسعه همکاری ها، دعوت کرد که به دوشنبه سفر نماید و اشرف غنی نیز این دعوت را پذیرفتهاست.
طبق اعلامیه ارگ، هر دو جانب توافق کردند که هیاتی تحت ریاست محمد حنیف اتمر؛ سرپرست وزارت امور خارجه، در روزهای نزدیک به تاجیکستان سفر نماید و روی آجندای نشست رؤسای جمهور تاجیکستان و افغانستان به خاطر همکاری های بیشتر، کار کند.
