شفقناافغانستان-ارگ ریاست جمهوری افغانستان اعلام کرد که عبدالمتین بیک به عنوان رئیس عمومی دفتر مقام عالی ریاست جمهوری گماشته شده است.
به گزارش خبرگزاری شفقناافغانستان، ارگ ریاست جمهوری افغانستان امروز شنبه (26 سرطان) نوشت: رئیس جمهور محمد اشرف غنی، ظهر امروز عبدالمتین بیک را به حیث رئیس عمومی دفتر مقام عالی ریاست جمهوری، رسماً معرفی کرد.
ارگ ریاست جمهوری افغانستان گفته است، که رئیس جمهور غنی ضمن ابراز امتنان از کارکردهای محمد شاکر کارگر رئیس پیشین ریاست عمومی دفتر مقام عالی، از عبدالمتین بیک بخاطر اینکه در این شرایط حساس، مسئولیت مهم را پذیرفت، تشکر کرد.
ارگ نوشته است، که رئیس جمهور کشور خطاب به عبدالمتین بیک گفت، که شما تجربه لازم در امنیت ملی، ارگان های محلی و هیأت مذاکره کنندۀ جمهوری اسلامی افغانستان دارید.
در ادامه این خبرنامه آمده است، که رئیس جمهور ضمن آرزوی موفقیت به عبدالمتین بیک در امور محوله، گفت که تعهد، اراده، صداقت و تصمیم قاطع ما برای خدمت به این خاک کاملا روشن است.
وی پیش از این در سمت های مشاور ارشد امور سياسی و مردمی مقام عالی رياست جمهوری، رئيس عمومی اداره ارگان‌های محلی، معاون ولايتی رياست عمومی امنيت ملی، معين مالی و اداری اداره ارگان‌های محلی و مشاور وزارت امور داخله انجام وظيفه نموده است.
