کشف 121 کیلوگرام مواد مخدر از موترهای باربری افغانستان به چین در تاجیکستان

شفقنا افغانستان – آژانس کنترل مواد مخدر تاجیکستان می‌گوید که ۱۲۱ کیلوگرام متامفتامین را از موترهای باربری افغانستان که به چین می‌رفتند، کشف کرده است.

به گزارش شفقنا افغانستان، آسیاپلس روز سه‌شنبه، ۱۶ دلو، به نقل از آژانس کنترل مواد مخدر گزارش داده که این مقدار مواد مخدر ماه گذشته در جاده دوشنبه-کولما پیدا شده است.

طبق گزارش، این مواد به چین قاچاق می‌شد.

ظفر سمد، رییس آژانس کنترل مواد مخدر تاجیکستان، افزوده که قاچاق مواد مخدر از افغانستان به تاجیکستان در سال ۲۰۲۴ نسبت به سال‌های گذشته ۵۹ درصد افزایش یافته است.

براساس گزارش، این مواد مخدر در میان سنگ‌های قیمتی به چین منتقل می‌شد.

گفتنی است که تاجیکستان پیش از این نیز تأکید کرده بود که هیچ نشانه‌ای از کاهش قاچاق مواد مخدر از افغانستان مشاهده نشده است.

اگرچه طالبان کشت و قاچاق مواد مخدر را رد می‌کنند، اما نهادهای بین‌المللی همواره از افزایش این پدیده گزارش داده‌اند.